IBUKIN TE MATE

Atuau!  Bon Am toro aio ae te nati te mwaane ae natin Am toro are e a tia ni Kakoauako ma Am kanikina, ao ni kaineta moana Nakoim, ni kabwaninaki ni kamwaawaaki man bwaai nako ma bon ti Ngkoe.  Bon Ngkoe, ni koaua, te kabanea n ataataiaomata mai buakoia naake a kaota te ataataiaomata.

Ngkoe Are E kakabwarai bureia aomata ao E kakarabai aia kaairua, baairea taekana n ai aron botaun karawan Am tituaraoi ao marawan Am raoiroi.  Kariaia rinna i nanon Oon Am atataiaomata ae riao are iai i mwaain bouakinan te aba ao karawa.  Bon akea te Atua bwa tii Ngkoe, Kakabwarabure te Kabanea n Tituaraoi.

Ke e na atonga, ngkanne, onoua te tai te kamauri "Allah'u'Abha", ao ngkanne atonga kaka tebwimaruaiwa te tai kiibu aika i nano n tatabeua nako:

Ti bane, ni koaua, n taromauria te Atua.
Ti bane, ni koaua, ni bobaraaki i matan te Atua.
Ti bane, ni koaua, ni kabanei nanora i bukin te Atua.
Ti bane, ni koaua, n anga te nebonebo nakon te Atua.
Ti bane, ni koaua, n anga kaaitau nakon te Atua.
Ti bane, ni koaua, ni kaantaninga iroun te Atua.

(Ngkana te mate te aine, ke e na atonga:  Bon Am tabonibai te aine aio ao te nati te aine ae natin Am tabonibai, etc...)

Atuau!  Ngkoe ae te Tia Kabwarai buure, Te Tia Tituaraoi, te Tia Kabebetei-naano!

Ni koaua, I Bubutiiko ma te nanorinano bwa Ko na kabwarai bureia naake a katikui rabwataia ao a tia rierake nakon te aonaaba n tamnei.

Au Uea!  Kaitiakiia man taian bure, katoki nanokaawakiia, ao bita rotongitongiia nakon te oota.  Karikiia bwa a na rin n onarokan te kimwareirei, kaitiakiia ma te ran ae moanibaan te itiaki, ao katauia bwa a na noora Mimitongim i aon te tabuki ae moan te rietaata.